எனது பாதாளத் திரைப்படம் நீ

திரையிட்டுக் காட்டவியலா
பாதாளத் திரைப்படத்திற்கு நிகர்　நீ
எக்காலத்திலும் வர்ணம் பெற்றிடா
கறுப்பு வெள்ளைக் கனவு　நீ
கீதமிசைத்துப் பாடிடக் குரலொன்றற்ற
நானெழுதிய அழகிய கவிதை　நீ
எடுத்துரைக்கப் பெயரறியாத
தாங்கிக் கொள்ள முடியா மலர்வாடை　நீ

நிசி முழுதும்
பனிக் கண்ணீர் சிதறிட அழுது ஓலமிடும்
தொலைதூர இருள்
முடிவிலியில் மறைந்து செல்லும்
விடியலுக்கு உரித்தற்ற
நிரந்தரமான கனவு　நீ
நாளையென்றவொன்றைக் காணா
எதிர்பார்ப்புகள் மரணித்துப் போன
எனது வாழ்வின் இக்கணம் நீ

- சந்திமா நிஸ்ஸங்க 
தமிழில் - எம்.ரிஷான் ஷெரீப்

நன்றி
# உயிர்மை

ஜப்பான் பேனா நண்பி

முன்னர் அவள் அனுப்பியவை

நீண்ட கடிதங்களுடன்

காய வைக்கப்பட்ட செர்ரி மொட்டுக்களும்

செக்கச் சிவந்த மேப்பிள் இலைகளும்

புகைப்படங்களில்

பனி நிறைந்த சோலைகளில்

ரோஸா நிறத்தில் மலர்ந்திருந்தாள்

அனைத்து மடல்களிலும்

ஆங்கில வகுப்பினைக் குறித்தும்

குளிர்தினங்களில்

நீச்சலை விரும்பாத குளத்தின்

தங்க மீன்களைப் பற்றியுமே

எழுதியிருந்தாள்

காலம் செல்லச் செல்ல தற்பொழுது

என்றாவது வருகிறது கடிதம்

அதே இடம்தான் இது

பெரிய கட்டிடத்தின் அடியில்

வீட்டுக் குருவிப் பார்வையோடு

அவளிருக்கும் இப் புகைப்படம்

இப்பொழுதுதான் வந்தது எனக்கு

‘நித்திரையேயில்லை இரவில்

புகைபிடிப்பதை நிறுத்த முடியவில்லை

என்ன செய்ய வேண்டும்?’

புகைப்படத்தின் பின்னால்

அவளது உடைந்த கையெழுத்து

மூலம் - இஸுரு சாமர சோமவீர

தமிழில் - எம்.ரிஷான் ஷெரீப்

நன்றி
# 'தாமரை' இலக்கிய இதழ் - ஜனவரி, 2012
# உயிர்மை
# நவீன விருட்சம்
# திண்ணை

நான் வெளியேறுகையில்…

நான் வெளியேறுகையில்
என்னைத் தொடர்ந்து
புன்னகைத்தபடி
வருவதில்லை நீ வாசல்வரை
முன்பு போல

கட்டிலிலே சாய்ந்து
என்னையும் தாண்டி
கதவினூடாகப் பார்த்திருக்கிறாய்
தொலைதூரத்தை

அமைதியாக
பறக்கிறது பட்டம்
மிகத் தொலைவான உயரத்தில்
நூலிருக்கும் வரை

தெரியும் உனக்கும்
என்னை விடவும் நன்றாக

- இஸுரு சாமர சோமவீர
தமிழில் – எம்.ரிஷான் ஷெரீப்

நன்றி
# உயிர்மை
# திண்ணை